ОУ Гоце Делчев
Гоцеделчевци пред финишот на учебната година, засилено освојуваат државни награди. Ги бидува и за рецитирање, и за пеење, и за свирење, па и за трчање.
Деветтоодделенката Стефани Стефаноска, меѓу 20 најдобри државни рецитатори, се искачи на второто место. Континуирано добива признанија за песничките на разни литературни читања и рецитаторски натпревари. Го сака и актерството кое í помага подобро да ги долови емоцииите низ песната. Блеснала со “од дома” подготвената песна, а успешно се снашла и со предложената песна од жири комисијата. За десетина минути ја совладала и без трема ја изрецитирала.
– Среќна сум за успехот. Кога рецитирам, се трудам да се пронајдам себе си во песната и тоа да го вдахнам во изведбата – вели Стефаноска.
Менторот Билјана Јагуриноска е презадоволна од ученичката, додавајќи дека Стефани секогаш се истакнува, остава впечаток, оти во себе носи дар за рецитирање.
Гоцеделчевци тука не запираат. Со нежните детски гласови усогласени под диригенство на наставникот Љупчо Мирчески станаа државни прваци во хорско пеење. Вешти беа и музичарите, па свирењето на инструменти им донесе прво место на државниот натпревар за мандолински оркестар.
А деветтоодделенецот Леонид Вандевски е познат по високите атлетски достигнувања. На државното првенство за основни училишта го зграпчил првото место истрчувајќи и нов личен рекорд 2.13 во омилената дисциплина, 800 метри.
– Немам доста брзина, но имам издржливост, која на максимален начин ја користам – вели Вандевски.
Секогаш освојува медали, а годинава вторпат триумфира во атлетиката, кога претходно стана државен првак и на крос од 1500 метри.