Десетици гладни градски гулаби се натопориле на храната што им ја фрлаат дуканџиите околу споменикот на Итар Пејо во Старата чаршија. Природниот инстинкт за глад ги тера дури и да очекуваат дека ќе потече мед од грнето на Пејо над чаршиската чешма. Дуканџиите велат дека ги заиткале, откако им фрлиле малку леб, малку пченица… Дури и го научиле и времето на појадок, па настрвени чекаат да се заситат и да ја наполнат бапката под клуновите.
Овие мили птици се украс на плоштадите на повеќе метрополи низ светот. И кај нас станаа пердувести миленици на дуќанџиите. Некој забележал дека летоска биле многу побројни, а во меѓувреме исчезнале, оти биле мета на несовесните ловци кои ги тепале низ полињата за време на жетвата.
