ЦК ,,Марко Цепенков“
Љубителите на ликовната уметност вечерва ќе имаат две доживувања. Најпрво во 20 часот во ликовниот салон е отворањето на изложбата на 20 фотографии “Анаграми за себепрепознавање” од Александар Ѓорѓиев, а од 20:30ч. во галеријата е претставувањето на делата од Здружението на копаничарите на Македонија.
Ѓорѓиев работи во Министерството за култура. Имал повеќе изложби, учествувал во проекти, работел на публикации, монографии и на филм. Првпат изложува во родниот град.
– Предмет се фрагменти од црква или манастир, мотив од некоја икона или мозаик, комбинирајќи ги со различни симулирани потези на четка, кои на делата им даваат одмерена сугестија и надреалност. Ова е една техничка и естетска фотоартистичка изведба – вели д-р Владимир Величковски.
Во галеријата ќе бидат претставени 36 копаничарски творби од 18 автори од Прилеп, Битола, Кичево, Скопје, меѓу кои и на нашите Никола Топчиоски, Стеван Боцески и Ристо Тошевски.
Здружението на копаничари на Македонија постои од 1993 година и брои над 200 членови.
