„ПРИНЦОТ НА МОТОРЦИКЛ“
“Минаа многу рамноденици.
Ти дојде и ми го понуди
Твоето кожно палто
Во случај да ми е ладно;
Ти понудив јас превоз
До незамисливите височини
На прифаќањето и безусловното –
сакање и битисување”
Ова се само дел од стиховите во збирката “Принцот на моторцикл” од сограѓанката Ирена Иракоска – Томиќ.
Иако дипломиран физеотерапевт, Иракоска, пишува од душа и со срце. Збирката е селекција од 50 песни, меѓу многуте други, пишувани 18 години.
-Темата е главно љубовна, како и размислувања за тоа што е вистинско посакувано и коректно, наспроти бунт кон лицемерието, површноста и пакосноста. Иако сите песни се во прво лице еднина, не се сите автобиографски, туку се стремат да ја интензивираат емоцијата кај читателот. Затоа е употребен токму тој стил – вели авторката.
Иракоска е авантурист, љубител на животни,и на пишаниот збор. Во 1999 година ја објави стихозбирката за деца “Мојот свет”.
Таа, инаку, е поранешен репрезентативец во карате.
