Демне опасност од каналот стар 60 години на улицата “Мице Козар”
Попушти бетонот под каналот на Дабничката Река кај кружниот тек кај поштата. Среќа е што никој не е повреден во густиот сообраќај на тој потег од градот. Водовод и канализација, во координација со локалната самоуправа, го обезбеди просторот за непречено одвивање на сообраќајот.
Од општината најавуваат санирање и нормализација на сообраќајот.
Судејќи по искуствата од пред една деценија и законските процедури, санирањето не ќе оди брзо. Дотогаш е потребна внимателност при движењето, трпеливост на возачите од сообраќајниот метеж што се создава заради “тесното грло” и заобиколување на овој дел од градот.
Не е првпат да пропадне асфалтот, односно армираниот бетон такаречи на истото место, каде некогаш бил стариот турски мост Кемерлија, а во почетокот на шеесеттите години бил направен канал до старата автобуска станица за артикулација на дивите непредвидливи води на Дабничката Река. Третпат пропаѓа асфалтот. Првин пред 10 години пропадна камион. И следната година подлегна бетонот под камион.
Не е чудно зашто каналот е стар околу 60 години. Проектиран е за пешачка зона и шеталиште, а не за улица и за товарни камиони. Колку за информација, под коловозот на улицата “Мице Козар” продолжува каналот до населбата Тризла. А на таа сообраќајница се пренасочени товарните возила од 30 тони кои доаѓаат од рудниците на мермер. Не би било изненадување да пропадни и целата улица, зашто бетонот нема бескраен век. Локалните власти нужно е да размислуваат за темелна рехабилитација на каналот и прилагодување на новите сообраќајни потреби и за обезбедување на граѓаните од посериозни последици. Тоа не е евтин зафат, зашто се работи за неколку стотици метри бетонски канал со широчина поголема од еден матар, чиј бетон одамна го минал векот на трајност.
