Клубот на литературни творци Прилеп има нов претседател. Членовите на Собранието на Клубот едногласно за прв човек ја избраа Андриана Ристеска, истакната поетеса. Нејзин заменик е поетесата Весна Шереметкоска. Изборното собрание било свикано после неотповикливата оставка на досегашната претседателка Снежана Паноска, која замина од функцијата заради лични причини.
Ристеска вели дека Клубот и во иднина ќе продолжи успешно да ја исполнува својата цел, а тоа е промоција на поетите и писателите од Прилеп и промоција на творештвото на роднокрајните творци во Македонија и пошироко.
-Со програмата за 2022 година, следна активност е средбата на Здруженијата и литературните клубови од Македонија во мај, на која домаќин ќе биде Прилеп. Оваа традиционална средба заради ковид пандемијата не беше одржана две години. Друга поголема манифестација е јубилејното 15-то издание на Поетско Маркукуле. Тоа е меѓународна манифестација која најчесто се одржува во вториот викенд во август. Планирано е учество на повеќе литературни манифестации низ Македонија, но и во соседните држави ако има услови за тоа. Приоритет е привлекување на нови млади талентирани творци од градот и промоција на нивното творештво. Прилеп отсекогаш бил ризница на надарени литературни творци.. Така ќе остане – вели Ристеска.
