Последна фаза за изградба на конакот во Св. Архангел Михаил
Се гради последната фаза на источниот конак во манастирот Св. Архангел Михаил во Варош, по што, според, Заводот и Музеј, ќе се врши внатрешното уредување на конакот. Паралелно, ќе се конзервира влезната порта на манастирскиот комплекс.
– По 150 години, на есен, манастирот ќе го добие конечниот изглед и целовитост – изјави Гордана Данилоска Спироска, директор на Заводот и Музеј.
При крај се и корекциите на проектот за обнова на конаците на Трескавец.
– Во јуни ќе се објави тендерот за изградба на опожарените манастирски конаци, откако проектот ќе се усогласи со законот. Сега се проектира конзервација на црквата, трпезаријата и магерницата. Трескавец ќе го добие конечниот изглед во 2018 година. Финиш ќе биде конзервацијата на живописот – додава директорката, напомнувајќи дека ќе се проектира и конзервација на црквата во Зрзе, каде веќе се изградени новите монашки и владички конаци.
За градоначалникот Марјан Ристески, зафатите ќе влијаат на развој на манастирскиот туризам.
При крај е и реконструкцијата на старата куќа на Жеревци.