Простувањето ја олеснува душата
Секое живо суштество греши, некој помалку, некој повеќе. Големината на човекот не е во тоа што помалку да греши, туку во покајувањето и во неповторувањето на грешките. Ние сме со духот на Прочка, со дух на проштевањето, оти кому сé не сме му простиле и кој сé нам нé ни простил и покрај сé. Простувањето е по примерот на Бог, а токму празникот Прочка или Велики Поклади означува ден на меѓусебно безусловно и безгранично проштевање меѓу луѓето. Ден кога и небото í простува на земјата, а човекот му простува на човекот. Прочка е духовна метла со која ја чистиме душата од гревови. Се слави искрената и пожртвувана љубов, оставајќи го злото зад себе и живеејќи во мир со себе си и со ближните и подготвени, со чиста мисла да влеземе во Велигденскиот пост.
Според адетот, помладот бара прошка од постариот, синот пристапува кај таткото, братот кај братот си, ќерката кај мајка си, снаата кај свекрвата, сестрата кај сестра си, сопругата кај сопругот и секој секому му вели “Прости ми”, за постариот да возврати “Простено да ти е од мене и од Бога”. И така секој кон секого, и машко и женско, помладиот кон постариот, но и обратно.
Екипата на Зенит се вмеша меѓу граѓаните, “ѕиркајќи” во нивните души, наведувајќи ги да помислат на “смелост” да побараат прошка и кому ќе имаат срце да им простат со прашањето “Кој на кого ќе му прости в недела?”. Некој немал за што да бара прошка, друг како постар очекува само да простува, но мнозинството се сложи дека помладиот е тој што бара прошка од постариот и дека треба на сите простено да им е.
Грозда: На “газдата” ќе му простам. Ќе се опра тогаш рабојчето.
Слободанка: И на политичарите ќе им простиме ако направиле грешки. Оти сите грешиме и сите еден со друг мораме да си простиме. На најмилите ќе им простиме. На сите.
Билјана Петреска: Господ треба да ни прости на сите, оти сите сме луѓе и сите грешиме.
Мелани Паноска: Ќе му простам на родителите, на сестрите. Па и на дечкото. И ќе побарам прошка, оти се бара од постарите да ни простат што сме им згрешиле.
Јадранка: ќе му простам на тој што ми згрешил. Простувам. Ама тоа не значи дека сакам да се повторат грешките. Мислам дека слабо правам грешки, па нема да побарам прошка.
Стефан Бумбароски: На сите, иако никој ми нема згрешено нешто посебно. Се надевам и мене сите ќе ми простат, да биде возвратено.
Николина: На бившиот, оти ме изневери и ме лажеше. Па сега би му простила оти е минато.
Николина Сидороска Дебрешлиоска: На сите што ќе бараат прошка. А ќе побарам од сите постари и од помалите, ако сум им згрешила, оти сите грешаваме.
Татјана Ристеска: На домашните. Мажот ми ќе ми прости. Ако има некоја грешка, мора да ја поправиме, да се простиме тој ден. Затоа е и празникот.
Миле Мицески: На децата ќе им простиме. Ај постариве заминаа веќе. Децата културни ми се, ми даваат прошка.
Кристијан Бошкоски: На никого нема да му простам. Ама ќе побарам прошка од мајка ми и татко ми, како помал.
Сара Даскалоска: На најблиските и на другарките. И јас од нив ќе побарам прошка. Дека ми згрешил не, дека сум згрешила, може.
Милена Неделкоска: На цела фамилија. А од другарката Сара ќе побарам прошка за сé досега што í сум згрешила.
Викторија Аџиоска: На момчето. Ќе побарам прошка од сите.
Митре Драгутиноски: На сите постари од мене, роднини, пријатели. А ќе побарам прошка од помалите, од внуците. А и од девојката, таа треба да ми прости, оти е помала.
Моника Соколеска: На сопругот. Нема да побарам од никого прошка, оти никому немам згрешено па да ми прости.
Гордана Стојческа: На постарите ќе им простиме. Родители немаме за жал, сите се починати. Прво на гробишта кај починатите, па после и кај живите. Баба сум и ќе чекам децата да побараат прошка.
Борис Трајков: Никој ми нема згрешено, нема на кого да му простам. Ако сметам дека сум згрешил, секако ќе побарам прошка.
Боби Димитриоски: Само на мајка ми. И од неа ќе побарам прошка.
Зоран Иваноски: На сите, оти кој сака доброволно може да ми побара прошка. Од секому ќе барам прошка. Таков е редот.
Маре Илиоска: На никој не му простувам, освен на постарите. Од ќерките ќе побарам прошка ако сум им згрешила.
Гордана Котеска: Од постарите, на мајка ми и на сопругот. А внуците, снаата, синот мене ќе ми простат, млади се.
Донка Степанулеска: На ќерката и на сите што ќе дојдат за Прочка. Немам од кого да барам прошка, освен ако појдиме кај браќата, кај сестрата. Од секого се бара, не само од помалите, туку и од постарите.
Христина Стеваноска: На мајка ми и татко ми, на свекор ми и свекрва ми, па и на колешките од Витаминка. И од нив ќе побарам прошка, така едни со други ќе си простиме.
Гоце Силјаноски: На сите им проштевам, иако претежно никој не прашува за простување, освен фамилијата. Само од мајка ми ќе побарам прошка, од никој друг не барам, само простувам.
Фанче Насоска: На родителите сигурно и на тие што ми згрешиле, ако ми побараат прошка. Од мајка ми и татко ми, од тетките ќе побарам прошка.
Роберт Жикоски: Ќе побарам прошка од мајка ми и сестра ми. Никој не ми згрешил, така да, не очекувам некој да ми побара да му простам.
Василка Младеноска: Немам некоја грешка за простување, оти не сум таков тип што намерно греши. Инаку, секој што смета дека сум му направила грешка, нека ми прости.
Јулијана Иваноска: На постарите ќе им проштевам. На девери, золви, оти мајка, татко немам. Не барам прошка, кој има нека се простува.
Сузана Станкоска: На мајка ми, на сестра ми, на зет ми, на свекор ми и свекрва ми. Ќе побарам прошка од сопругот, оти помала сум.
Вера Биноска: Не знам некому да сум му згрешила или да ми има посебно згрешено. Инаку би простила во секој случај.
Нема поблагородно чувство за душата од проштевањето, оти тоа го поттикнува добродателството. Тоа е блажена состојба на душевна радост. Прости му целосно и сé, оти тоа е вистинско дело на љубов, кога ги бришеш сите навреди, лаги и клевети и душата, и твојата и другата, ја растоваруваш од голема тежина.
