ВО ЧЕТВРТОК
ПРИЛЕП ВТОРПАТ ЌЕ ГО СОБОРУВА ГИНИСОВИОТ РЕКОРД, ПО ДОБИЕНАТА ТИТУЛА ОД ГИНИС ЗА ПОДГОТОВКА НА 80 ИЛЈАДИ ПОСНИ САРМИЧКИ ПРЕД ПЕТ ГОДИНИ
Спектакл ќе приреди в четврток конфекцијата Комфи ангел со “градба во живо” на џиновска перница за Гинис. Стотина работници од конфекцијата ќе ја создаваат на плоштадот најголемата перница на светот пред жири од Гинис и ќе се обидат да го урнат досегашниот Гинисов рекорд, поставен од белгиска фирма со перницата од 15х15 метри и тешка околу три тони. Градоначалникот Марјан Ристески рече дека и локалната самоуправа е логистика за промоција на градот, па и на земјата, а не само на компанијата.
На соодветно подготвен терен и техника за два-три часа, прилепските конфекционери и мајстори за перници и прекривки ќе ја создадат перницата со димензии 17,9х17,9 метри или околу 320 метри квадратни, а која ќе биде полна со фибер и природни материјали со тежина од пет тони. Спектакуларното рушење на рекордот ќе биде следено од граѓаните со музичка програма на квартетот Пламенка Трајковска и на Калиопи. На лице место ќе се гледа како се полни огромниот калаф со меки материјали.
– Перформансот што претендираме да го реализираме претставува целосна автентичност и оригинален производ. Очекуваме да го собориме досегашниот белгиски рекорд и да создадеме репрезентативен примерок на перница. Впрочем, тоа е условот што го бараат од организацијата на Гинис, а кој треба да го исполниме пред нивните очи – вели Николче Јанески, раководител на секторот за развој.
По завршувањето на манифестацијата, материјалот од перницата ќе се рециклира и ќе заврши за полнење на играчки – мачиња, кучиња од кадифе.
Градоначалникот Марјан Ристески очекува второ соборување на Гинисовиот рекорд на Прилеп и повторно запишување на градот во Книгата на рекордите, по првиот со зготвените 80 191 посни сармички за Свети Никола во 2008 година. Комфи Ангел е македонско – англиска компанија со 600 работници, акредитирана за производство на перници, протектори, јоргани и останати еко производи. Речиси целото производство се пласира во странство.
