МИЛИНА ЗА ОЧИ СЕ ЦВЕЌИЊАТА НА СТРАШО

Низ тутунските полиња, опсипани со голема љубов, цутат прекрасни видови цвеќиња во разни бои како колоритен остров. Каранфили, рози, кали, кринови, нарциси, хризантеми, ириси, гербери, антуриуми цветаат и зима и во лето на три декари под пластеници. Педесет и две годишниот Страшо Митрески, поранешен пожарникар го “запалиле” раскошот на цветните бои, создавајќи бизнис за егзистенција. Точно 18 години е во постојан допир по цел ден, понекогаш и во мрак. “Гладно” ги голта со погледот и ги наградува со потребната “храна”. Од семка до цвет им дарува внимание, ги варди од студ со греење, а лете ги наводнува, ги обезбедува со средства за заштита од инсекти и други напаѓачи и болести. Животот го “подарува” на шарената ливада под најлони, а украсните растенија, кои се празник на очите, му враќаат “леб” за семејството. 

Цвеќето на Митрески предизвикува пријатни чувства и ги краси домовите во Крушево, Кичево, Охрид, Ресен, Неготино, Кавадарци, иако поголемиот дел не веат мирис, освен белиот и розевиот ориентален крин.