Локалните власти на електронска аукција оттуѓија 14 плаца за градба на индивидуални куќи со приземје, два ката и мансарда во новата населба Градина. Постигнатите цени, кои тргнаа од едно евро за квадрат за плацевите од околу 300 квадрати, достигнаа од 700 до 2050 денари.
– Со децении не се продавало градежно земјиште за домување. Успешен е првиот обид. Постепено ќе организираме нови аукции за нови плацеви во населбата Градина, каде ќе живеат околу 14 илјади жители во индивидуални и колективни објекти. Населбата ќе има и училиште, градинки, трговски центар, спортски терени. Веруваме дека ќе го задоволиме гладот за градежно земјиште – велат од локалната самоуправа.
Локалните власти го продадоа плацот од 2110 квадрати на работ на прилепската касарна. Квадрат е продаден за 1524 денари. На околу 800 квадрати ќе се крене колективен објект за домување од десет ката со педесетини станови со различни големини.
На последниот повик за продажба на земјиште за фабрики во индустриската зона Прилеп 1, е продаден последниот плац од околу три илјади квадрати за 261 денар од метар квадратен. Таму веќе се гради инфраструктурата за дваесетина нови фабрики, каде ќе се ангажираат околу две илјади работници.
