Прилепчанката Божана Тренческа, која е љубител на поезијата и убавиот македонски збор, на Интернационалната поетска манифестцаија “Сплоти се Македонијо” распишана онлајн, за поети од Македонија и од дијаспората, ја освои втората награда за песната За тебе Македонијо. Творбите ќе бидат ставени во електронски зборник.
ЗА ТЕБЕ МАКЕДОНИЈО
Бевме фиданки откинати од ветрот
што со луњи се борат
и само една мала жичка
чинам нашите прадедовци ја ткаеле
не сврза еден до друг.
Низ оган и пукот одевме голи и боси
со твоето име на усните
и само една песна
што низ распуканите усни чувме
прадедовците да ја пеат, ја пеевме и ние.
Во ноќите глуви стражари бевме
во денот блескав орачи бедни
со крвта врела плативме почва
и сончев зрак
Денот молскавично мина во неврат
и однесе тага, однесе секаков бол
а твоето име Македонија
не згасна од нашите усни.
Во пазувите на денот неизмерно горди
облечени во сончеви поли
го градиме нашето денес и утре.
Секоја рака кула на мирот гради,
секое срце со твоето чука
и тој тропот низ песна ветерот го носи.
Во секој дом огниште на нашите сништа
дрвјата горејќи за тебе пеат,
нивниот пламен пламен на нашите срца,
жарот жар на нашите усни
а твоето име Македонија
цел свет го знае.
Божана Тренческа