Монографија
Здружението “Менелај” во соработка со Институтот за старословенска култура од Прилеп, ја публикуваше монографијата “Поствизантиските претстави на Страшниот суд на територијата на Р Македонија”. Се работи за исцрпна и заокружена студија на македонските илустрации на Страшниот суд настанати меѓу 15 и 18 век, а чиј автор е д-р Александар Василески.
Студијата е тематска целина, ретка во византолошката библиографија, во која монографски е третирана ликовноста на поствизантиските илустрации на Страшниот суд. Ова е комплексна тема во источнохристијанската уметност.
-Во монографијата, покрај темелните анализи на иконографските карактеристики и нивната семиотичка интерпретација на збирката ѕидни илустрации на Второто Христово доаѓање, научно се промислени и социополитичките фактори кои влијаеле врз еволуцијата на ликовноста на Страшниот суд во византискиот и поствизантискиот период. Голем дел од претставите ја доживуваат својата прва научна евалуација, проследена со богат илустрационен материјал – додаваат од Менелај.