Сигурно сте слушнале дека никогаш не се наздравува со чаша вода. Иако изгледа малку глупаво или уште една причина за убедување за пиење на алкохол, зад ова се крие древно и нималку наивно верување. Коренот на овој обичај е во Антиката. Старите Грци верувале дека кога човекот ќе умре, душата заминува во подземниот свет – ад. Таму се наоѓала тажна рамнина обрасната со бледо диво цвеќе. По рамнината течеле пет реки, ледениот Стикс – река на омразата, Ахерон – река на болката, Кокитус – река на јадовите, Флегетон – река на оганот и Лета – река на заборавот. Кога душата на покојникот ќе дојде во ад, пие од водата на Лета да го заборави минатото и маките од претходниот живот. Оние кои веруваат во реинкарнација, веруваат дека душите пијат од водата на оваа река да го заборават минатиот живот и да се подготват за новиот.
Тука лежи коренот на обичајот, никогаш да не се наздравува со чаша вода. Бидејќи, оној кој го прави тоа, ќе го снајде преран заборав и судбина полоша од смртта, односно ќе заболи од деменција.