Билјана Димеска – референт
– Здравје во семејството, повеќе време за своите. Поголема продуктивност во работата. Изучување на турскиот јазик како потреба за подобро работење во филијалата и позитивни ефекти во работењето. Повеќе клиенти со зголемена доверба во банките како институции кои ги чуваат и зголемуваат нивните финансиски средства. Подобрување на градската инфраструктура, особено паркинг просторот.
Владко Пејкоски – сметководител
– Новата да биде како и старата, само да не е полоша. Среќа, здравје и радост во фамилијата. Подобрување на стандардот и излез од економската криза со надеж никогаш да не се повтори. Поголема хуманост меѓу граѓаните. Толеранција и соживот на сите социјални категории и намалување на јазот меѓу нив. Подобар и поквалитетен избор на ТВ канали, особено спортските.
Борис Мавроски – агент за осигурување
– Да се подобри економската состојба и надеж за новороденче. Да се создаде поволна атмосфера за подем на инвентивните луѓе, а и за останатите. Да се препознаат предностите на животното осигурување и позитивен пристап за излез од лошата економска состојба. Здравје и бериќет за сите прилепчани. Што е можно повеќе издадени полиси за осигурување на животот, како највредно нешто, за кое вреди да се инвестира. Да се тргне настрана голема грижа од умот.
Горан Јорданоски – обезбедувач
– Поголеми примања и во новата година со надеж за женска принова во фамилијата. Мирна и стабилна атмосфера на работното место, со повеќе клиенти, без потреба за интервенција. Почитување на приватноста на шалтерите. Конечен крај на рецесијата и подобрување на економската состојба во градов и државава. Подобра патна инфраструктура. Здравје и среќа за сите.
Дејан Анѓелески – инспектор во ПС Прилеп
– Остварување на професионалните задачи и подобра безбедност за граѓаните. Помала стапка на криминал и да го направиме градот подобро и помирно место за живеење со помош на граѓаните. Првенствено, здравје и среќа во фамилијата, а и за секоја друга во Македонија. В година очекувам да се посветам повеќе на моето хоби – енигматиката.
Емран Бајрамоски – невработен
– Наоѓање на работно место со стабилна плата. Да престанам да бидам “роб” на социјалните работници и товар на општеството. Среќа и радост во фамилијата, и нормално повеќе пари за да можам да основам сопствена фамилија. Бериќетна Нова година за сите, без разлика на вера и политичка определба. Разбирање за проблемите на ромската заедница од останатите.
Зоран Тошески – келнер
– Подобро вработување, повисоки плати и Боже здравје, нов автомобил. Повеќе гости во кафулево. Да има рекласирана и убава атмосфера. Гостите задоволни да го напуштаат кафлето. Ја одрувам и унапредувам стекнатата профисионалност при услужувањето и приредувањето на одлична новогодишна журка. Клубов да “цвета” од задоволни муштерии, и стари и нови.
Илија Димоски – пензионер
– Подобри пензионерски денови, повеќе странски инвестиции во градов и државава, како и подобри меѓучовечки односи. Да се подобри економската клима за да доведе до подобри шанси за вработување на младите, наместо да безделничат во чаршијата и да ги трошат парите на родителите, кои мака мачат да “врзат крај со крај”
Орде Орданоски – средношколец
– Успех во учебната година, подобри забави во летниот период и со Господ напред, запишување на машински факултет. Подобрување на условите во средното индустриско училиште. Подобар однос меѓу вработените и учениците и позитивна клима кај соучениците. Повеќе места за добра забава за да не се повторува “истрошената шема”. Кул забави со супер девојки.
Тони Богоески – офицер
– Здравје и среќа во фамилијата и за сите останати. Повисок стандард на живеење. Остварување на зацртаните цели на професионален план со можност за унапредување и повисок армиски чин. Стабилност во Македонија и регионот и мирно решавање на меѓунационалните и меѓународни проблеми. Армијата да служи само за мирнодопски цели.