Единаесет прилепчани застапени се со песни во збирката поезија „Метрички карван“ во издание на Градската библиотека „Гоце Делчев“ од Гевгелија. Седмото изание вклучува автори од Гевгелија и Прилеп. Застапени се песни од прилепските поети: Василе Димески, Петар Петрески, Славчо Ковилоски, Сузана Ѓорѓиевска, Кирил Михаиловски, Игор Трпчески, Габриела Стојаноска-Станоеска, Тони Павлески, Жаклина Свеќаровска, Кирил Бисероски и Александар Војнески.
Во изборот доминираат автори од помладата генерација творци кои, како што посочуваат составувачите, „со себе носат современ поетски сензибилитет кој ги воспева егзистенцијалните норми и димензии како мисла и смисла на светот и векот – минливоста, бесмислата, апсурдот и парадоксот“.
– Во просторот се откриваат нивните бои, мириси и вкусови. Така, во гевгелиските воспеви зад секој збор се калинката, смоквата, грозјето, крапот, молкот на езерската вода, а легендите и преданијата како далечно прилепско ехо ги отсликуваат каменот, карпите, тутунот – соопштија Стефан Марковски и Дамјан Ѓуров, составувачи на поетската книга .