СОУ „Орде Чопела“
Техничарите за хортикултура од СОУ „Орде Чопела“ со професорката Ружица Јагуриноска ја будеа еколошката свест кај учениците од ОУ „Климент Охридски“ кои сакаа да го уредат задниот двор со цвеќе. Со радост им излегоа во пресрет, донирајќи им расад од темјанушките, произведени во стакленикот на училиштето.
Повозрасните им покажаа на помалите како се сади. Активни беа четвртоодделенците со наставникот Цветанчо Волчески, шестооодделенците – природници со наставничката Цветанка Јочкоска, од биолошката секција со наставничката Наташа М. Михајлоска и учениците од ликовната секција со наставникот Влатко Николоски, кои старите пластични шишиња ги претворија во саксии во кои ги засадија темјанушките.
– Секое дете сакаше да засади цвеќе, а ние го промовиравме профилот техничар за хортикултура за кој не знаеа дека постои. Бидејќи училиштето уште го знаат како хемиско и тутунско, се трудиме на било кој начин да ја разбиеме заблудата – кажува Јагуриноска.
Двете училишта остварија меѓусебна соработка. Низ ЕКО програмата за разубавување на училишниот двор во основното училиште се поврзаа еко-знаењата и животното искуство.
