ОУ „Гоце Делчев“
Првото и второ место, меѓу 118 учесници, им припадна на „гоцеделчевци“ на државниот натпревар по писмен состав по француски јазик. На темата “Со францускиот јазик се создаваат пријатели низ целиот свет” под менторство на Ирена Наумоска, осмоодделенецот Марио Јакимоски не само на регионален, и на државен беше избран за “нај” со најмногу бодови. Зад него е Стефанија Шамовска. Ништо помалку не беше четвртопласираниот Здравко Здравкоски. Или пак Ева Талеска и Габриела Лазоска, со освоени петто и шесто место на регионално ниво. Со пофалница е Тамара Тасеска. Трудољубивоста дава плодови и е резултат на континуиран процес.
Посебно искуство натпреварувањето на странски јазик е за Ева.
– Наместо три, употребив пет зборови од франкофонските земји. Напредувам во знаењата – кажува Талеска.
Возбудата и среќата се неизмерни кај Стефанија. Првото учество се крунисало со успех во силната конкуренција.
– Имам голема желба за изучување. Поттик и среќа е што имам наставничка како Ирена – додава Шамовска.
Ланското искуство, петто место на регионален, на Марио му беше од голема помош да се крене до врвот.
– Верувам дека францускиот јазик може да нé доведе до нови пријателства. Ме инспирираа и дедо ми и сестра ми кои живеат во Франција. А по освоеното место, се засили желбата да студирам во Франција и да запознавам други деца – кажува Јакимоски.
Деветтоодделенката Габриела е редовна на натпревари по англиски, физика и сообраќај, а сефте í е по француски.
– Ме привлекува францускиот, оти е интересен и лесно се учи. Интезивно вежбам и за пласман на Олимпијада – додава Лазоска.
Тамара преферира да го говори овој милозвучен јазик, особено со роднините во Франција.
– Не беше толку страшен натпреварот, но предизвик беше кога зборовите требаа да се вметнат во составот – вели Тасеска.
На Здравко, ем прво искуство, ем си фатил награда.
– Радосен сум. Поттик е за учество на други јазични натпревари. Од помош е наставничката, интернетот… – додава Здравкоски.
Расте интересот кај учениците за учество на натпреварите по фанцуски јазик. Вториот странски јазик го избираат со задоволство, оти знаат на колку лесен и интересен начин ги пренесува содржините наставничката. Најголем доказ на “освојувачите” на награди, е огромната љубов и мотивација.
– Имаше голем интерес, оти темата е актуелна. Францускиот како светски јазик отвора врати насекаде, ги добилижува луѓето едни со други од многу држави. Можеби ќе им овозможи студирање во некоја франкофонска држава. Со натпреварот се прошируваат знаењата, а успехот е значаен за сите. Најголема среќа се учениците кои безрезервно се вложуваат да стигнат до врвот – додава Наумоска.
Со освојувањето високи позиции се одбележа и месецот на франкофонијата.
