Витаминка повторно е дел од најголемото саемско случување, Ануга 2021, во Келн, Германија. Компанијата изложи голем дел од својот асортиман, во групата кондиторски производи, посебно производите што се наменети за странските пазари.
Ануга е водечки светски саем за индустријата за храна и пијалаци, со уникатен концепт што за учесниците овозможува максимално деловно влијание. Претставува платформа за привлекување на сите релевантни страни од трговијата, производството и угостителството.
-Додека се одржува, Ануга претставува центар за производителите, трговците и угостителите. Никаде на друго место не се среќава глобалната прехранбена индустрија во овој обем. Ова е најважното место што нуди најдобри можности за поврзување низ целиот свет. Со присуството на врвни одлучувачи, Ануга е тренд барометар за глобалната прехранбена индустрија. Да се биде дел од ова случување значи многу, затоа што врз искуствата, знаењата и контактите стекнати тука, се гради целата развојна стратегија на компанија, а уште повеќе е значајно за нас по минатогодишното отсуство – вели Љупчо Велески, директор на извоз во Витаминка.
Освен кондиторскиот сектор, Ануга претставува саем на 10 различни концепти на храна, вклучувајќи леб и печива, разладена и свежа храна, кулинарски концепти, млечни производи, пијалаци, замрзната храна, топли пијалаци, месо и органски производи.
Се одржува на 284 000 м2, со ужество на околу 8000 изложувачи од стотина земји од целиот свет. Саемската манифестација ја посетуваат во просек по 170 000 посетители од над 200 земји.
