Владо компани
По шест години остра битка со конкуренцијата, фирмата за трговија со бела техника Владо Компани успева да одолее на немирниот пазар. Двајцата сопственици Владо Глигороски и Ицко Ѓорески велат дека бизнисот го одржуваат и го унапредуваат со непосреден контакт и љубезност со муштериите, со остварување на нивните желби до крај.
-На повозрасните муштерии, не само што им ги носиме печките на цврсто гориво до домот, им ги качуваме на катовите, им ги поставуваме бориите и го запалуваме огнот да се види како функционира платената стока. Така е и со фрижидерите, машините за перење електричните шпорети и други погломазни апарати што ги нудиме. Зашто кај нас важи девизата дека муштеријата е секогаш во право и не знае да згреши. Тоа е нашата формула за успех – вели Глигороски.
Откриваат дека нужно е збогатување на понудата според вкусот на муштериите.
-Продаваме и пелети и брикети, а за децата дури и автомобилчиња на акумулатор. Муштеријата не смее да излезе со празни раце поради услугата или понудата. А и со цените сме најниски, вклучувајќи ги погодните начини на одложено плаќање на повеќе месечни рати. Иако имаме продавница во Прилеп, нé открија и во Струмица, Гевгелија, Кичево, Битола, Македонски Брод, а за околинава и да не зборувам. Сите нé знаат и ја бараат белата техника поради тоа што ја транспортираме до нивните домови – објаснува Глигороски.
Фирмата израснала на темелите на земјоделската фирма за производство на тутун “Ортаци” на Глигороски и Ѓорески. Владо компани е искалена и е плод на повеќегодишната соработка на ортаците. Таа е еден вид круна на бизнисот на двете семејства.
-Вклучени се и децата кои се академски образовани и подинамично го водат бизнисот. Од конкурентите не се плашиме, туку секој со среќата и со многу труд и напор, веќе создадовме лојални муштерии кои се услужени до максимум. Конкурентите не ја деблокираат машината за перење, качена на петти кат во бањата и не ја активираат пред купувачите. Условите, услугата и чесноста се рецепт на успехот – вели Ѓорески.
Глигороски работел со бела техника и ја познава оваа бранша. Тргнувајќи од својата логика кога парите од тутунопроизводството ги вложувал, а не правел ,,егзибиции,, и тутунарите купуваат трајни добра кога ќе ги земат парите. Секако и плаќањата на рати преку синдикатите е олеснување на секое семејство.
Во близина на селото Новоселани, од каде што потекнуваат, изградиле голем магацин за складирање на стока блиску до Прилеп. Објектот е опремен со вилушкари и превозни средства.
Според Глигороски, партнерството им оди оти владее паролата, “Кај што има слога – има и Бога”. Почнале со тутунот и продолжиле со белата техника.
Глигороски и Ѓорески кренаа голем челичен крст, симбол на христијанството кај селото Новоселани, што ќе остане за навек за сеќавање на сите генерации на двете фамилии.