Наскоро нова продажба на локации за фабрики и куќи
Локалната самоуправа ќе продолжи со продажба на локации за фабрики и индивидуални станбени објекти со завршувањето на изборниот процес. Ова беше најавено на последната седница на Економскиот совет на општината, на која меѓу другото се расправаше и за инвестициите годинава во областа на економијата, инфраструктурата, спортот, образованието и културата, предложени од бизнис секторот.
Се најавија нови капитални проекти за в година.
– Со завршувањето на изборниот процес продолжува продажбата на парцели за индивидуални куќи. Предвидени се околу 20 парцели во населбата Градина, каде веќе се гради и инфраструктурата. Паралелно ќе се продаваат пет парцели во индустриската зона Прилеп 2, наменети за мали и средни претпријатија. Огромен е интересот. Продажбата почнува веднаш штом ќе стигне дописот од Антикорупциска комисија дека може да се продава – рече градоначалникот Марјан Ристески.
Тој информира дека е донесен и деталниот план во кој е предвидено на стариот пат за Битола продажба уште на десетина нови парцели, со големина од 3000 до 30.000 м2, наменети за фабрики и погони од лесната и незагадувачка индустрија.
– На електронска аукција ќе се продаваат 4 парцели за колективна градба и деловен простор во кругот на касарната. Се очекува интерес од инвеститорите. В година ќе се продава на електронска аукција и најатрактивното земјиште. Тоа е просторот на старата општинска зграда со површина од 7.000 м2. Изработени се генералниот и деталните урбанистички планов. Во меѓувреме се разговара со министерствата за дислоцирање на нивните канцеларии, за простори за времено сместување до откупот на земјиштето од инвеститор – додаде Ристески.
Членовите на Советот расправаа и за продажба на објекти, сопственост на општината, а се атрактивни за развој на приватниот сектор. Станува збор за делови од урбаните заедници, за комерцијалниот дел на месните заедници, а кои останаа непродадени и уште неколку други објекти во населените места.
Стопанствениците го поздравија чинот на почеток на градбата на патот Прилеп – Градско, значењето од градбата на капиталниот инфраструктурен зафат како што е пречистителната станица, новите канализациони системи, асфалтирањето на улиците и локалните патишта, гасификацијата, изградбата на нови спортски сали и нови спортски објекти.
Членовите на советот решија в година да се востанови награда за општествено одговорна компанија на Прилеп, која во текот на годината ќе има најмногу активности во соработката со локалната зедница.
