СОУ „Орде Чопела“
На државниот натпревар Лидер, СОУ „Орде Чопела“ не само што беше домаќин на организацијата, туку и победник. Учениците не само што учествуваа во сите образовни профили и струки од прехрамбената струка, туки и во сите, освоија и награди. Апсолутни победници беа во профилот очна оптика, освојувајќи ги сите три места.
– Во сите струки, учениците зедоа награди што е голема чест и гордост. Благодарна сум на менторите за ангажманот и вложувањето во образованието на учениците – вели директорката Анита Ѓорѓиоска.
Титулата лидер í припадна на Барбара Башеска под менторство на Каролина Дамјаноска и Александра Стојческа Трајческа. Водена од истите професори, Викторија Димоска го освои второто место, а зад неа беше Сара Стеваноска под менторство на Ангела Петреска.
– Интензивно се подготвувавме со менторите и ова е многу значајно признание за мене и за нашето училиште, бидејќи докажавме дека сме најдобри оптичари во државава – додаде лидерот Барбара Башеска.
Натпреварите од земјоделската и градежната струка се изведуваа во Св. Николе и Скопје.
Кај ветеринарите, одамна е познато дека нема пораз во натпреварите. На туѓ терен во Св. Николе, веќе докажаниот ученик Спиро Божиноски уште еднаш ги докажа своите теоретски и практични знаења од ветеринарството, закитувајќи се со титулата лидер со менторот Игор Галоски.
– Признанието е доста значајно, оти го потврдува вложениот труд во изминатите четири години и доказ дека теоријата сум ја совладал и ја применувам на дело – вели Божиноски кој во практичниот дел од тестот вршел преглед на крава и апликација на лекови, што без проблем ги изведува и на училиште.
Во хемиско технолошката струка, Ивана Петреска со менторите Каролина Боцеска и Билјана Апостолоска беше второ наградена во профилот прехранбен техничар. Предводена од професорот Василчо Стеваноски, во градежно-геодетската струка Николина Ристевска го зазеде второто место. Под раководство на Камче Бошкоски и Ружица Јагуриноска, Сандра Јакимоска го освои второто место во хортикултура, а Ферат Амедоски беше трет меѓу техничарите за фармерско производство.
