Домаќини и учесници на “Чех опен 2012“ во Крушево
Од ПК Делта активни во две улоги. Домаќини се и учесници на големиот параглајдерски настан во Крушево “Чех опен 2012“. На натпреварите во дисциплината крос кантри – прелети се најавени 130 учесници. Чесите се организатори, а ние домаќини. Првпат се одржува чешко првенство во Македонија. Им се допаѓа пределот, меѓу петте најубави во светот – вели Мартин Јованоски, репрезентативец од ПК Делта.
Прекрасна глетка се првите тренинзи, кога пилотите го испробуваа теренот. Во воздухот е шаренило од бои на стотина параглајдери. Половината се од Чешка, а другата половина од други земји.
– Сакаме да бидеме одлични домаќини, така што нема сите да се натпреваруваме. Засега само јас сум пријавен. Во силна конкуренција очекувам висок пласман – истакна Јованоски.
ПК Делта се состои од семејството Јованоски, Миле, Мартин и Борјан. Сите ќе учествуваат на Европското првенство, во дисциплината прецизно слетување, во јули во Охрид.
