Фудбал: Додека кризата трае
-Домаќинот секој ден е во просториите
Пред триесетина години, кога славниот капитен на сплитски Хајдук, Ивица Шурјак, уживаше во фудбалската ,,пензија,, го запрашаа колку тогаш се интересира за клубот во кој некогаш поминал 10 години.
-Речиси нема ден да не поминам крај стариот стадион. И кога сум некаде подалеку во градот, ја вртам главата натаму, да видам барем некој од рефлекторите – рече Шурјак.
Верувавме дека неможна е поголема приврзаност кон саканиот клуб, но до кога? Додека не ги сретнеме нашите прилепчани ,,борините,,. За Нова година, кога се е под еуфорија, честитки и желби за здравје и среќа, точно на полноќ се јавува најзагреан навивач.
-Ај честита и среќна нова 2020 година!
-Благодарам. Исто и тебе нека ти е честита, среќна, бериќетна!
-Зеде ли некој играч Победа?
И деновиве, кога со коронавирусот настана најголема криза во човештвото, има луѓе што зборуваат за Победа. Еден повозрасен потслушнал дека се одложени сите натпревари, но, за секој случај, се јавува и прашува:
-Што направи Победа?
-Одложено е сé. Нема фудбал повеќе – му кажуваме.
Во неделата, кога кризата беше длабоко навлезена, пред Саатот на клупа седи сограѓанин, заштитен со маска.
-Како е, се издржува некако? – го прашуваме.
-Мора. Туку, што правиме со Победа? Кога ќе се доизгради стадионот?
Се распрашавме што се случува во Победа. По последниот првенствен второлигашки меч дома со Брегалница (0-2), на 7 март, последниот тренинг беше одржан на 13 март. Оттогаш наваму нема колективни, туку само индивидуални тренинзи. Секој играч добил програма и според неа работи дома. Така клубот, иако со лоши резултати, продолжува, колку што е можно, да функционира како професионален. И во најтешкото.
Дознаваме дека клубот правел напори да им го исплати планираното за овој период на тренерите и фудбалерите. Просториите не се оставени сами. Таму секој ден навраќа домаќинот Зоран Мирчески.
-Проветрувам и проверувам дали е сé во ред со струјата, водата. Во секое време сум на располагање на секој од тренерите или играчите што ќе побара некоја опрема: патики, тренерки и слично. Секој ден сум тука, со надеж дека скоро ќе помине кризата – вели Мирчески.
А, штом ќе помине кризата, следниот меч е со Тиквеш.
Комплетна дезинфекција
И Победа се заштитува. Стручно лице извршило дезинфекција како заштита од коронавирусот. Дезинфицирани биле сите канцеларии, соблекувални, тоалети…
Поставен потпорен ѕид
Нема тотален застој. Се постави потпорен ѕид на трибината што е зад голот, каде е ФК 11 Октомври. Ѕидот бил поставен поради тоа што е слабо земјиштето на таа страна. Земјиштето под големата трибина е цврсто како рид.
Кога ќе дозволат условите, се очекува да продолжат работите на малата трибина. Се работи за довршување на новинарската и ложата за гости. Таму доста беше направено лани, но остануваат уште подлогата, прозорците, вратите, инвентарот…
Можен е опстанок
Победа иако се наоѓа во незавидна позиција на второлигашката табела (наместо на спасоносното 6-то, е на 8-мо место), има шанса за спас. Надежта е во предлогот што клубот испратен до останатите клубови. Се предлага поради новонастанатата ситуација со коронавирусот да нема отпаѓање од лигите, вклучително и од Втората, туку да има проширување. Така, нема да има оштетени, туку ќе им се излезе во пресрет и на тие што се борат за пласман во погорен ранг.
Предлогот е праведен и затоа се очекува да го прифати и ФФМ.
