Фудбал: Почнува пролетниот дел
-Првиот меч е в недела со Беласица
Паузата завршува и в недела е пролетното продолжение од прволигашкото фудбалско првенство. Екипата на Победа ќе биде ,,домаќин,, на Беласица, во меч на кој како и долго пред ова, ја нема предноста на домашниот терен. До заклучувањето на весникот не се знаеше каде ќе се игра натпреварот, а во опција беа неколку града. Како и да е, од Победа се очекува атак кон трите бода. Впрочем, тоа е во планот, имајќи предвид дека само на тој начин може да се тргне кон целта – бегство нагоре на табелата, кон 7-то, спасоносно место. Беласица, иако е последноласирана, е ривал што не е за потценување со оглед на играчкиот кадар. Дека може да биде неизвесно се гледа во резултатите од есенските дуели: прво победи Победа со 1-0, потоа Беласица со 2-1.
Најбитен фактор е самиот клуб. Победа зимава претрпе големи промени на играчки план: заминаа Манчевски, Драгарски, Маркоски, Мустафов, Нвабуезе, Исаевски, Велкоски, Шопоски, Крстески, дојдоа Ристевски, Асани, а во последен миг се очекуваше уште некој. Очигледно шанса од Стручниот штаб предводен од Јане Николоски ќе добијат помладите, покрај досегашните првотимци. На генералната проба со Пелистер (1-2), почнаа: Тофилоски – Тимовски, Ристевски, Јаќимовиќ, Карчески – Ј. Наумоски, Спиркоски, Танушев – Трајкоски, Каланоски, Гешоски, во вториот дел играа Котевски, М. Наумоски, Мандиќ, Паноски, Ефремов, Асани, Неделков, Ристески, а за мечот со Беласица ќе може да се смета и на Макота. До првиот полуфинален дуел на 27 февруари со Академија Пандев, е уште првенственото гостување на Шкупи во Скопје.
Табела: Шкендија 40, Вардар 35, А. Пандев 30, Работнички 26, Шкупи 23, Македонија ЃП и Ренова 21, Силекс 18, Победа и Беласица 17.
