Изложба на дела од Снежана Малетин ќе биде отворена на први август, во 20 часот во ликовната галерија од ЦК ,,Марко Цепенков,,. Уметницата од Нови Сад, која живеела и во Прилеп, ќе се претстави со творештото, создадено во 2015 и 2016 година. Делата се резултат на креативна игра, испитување и истражување на можности и решенија во ликовна и техничка смисла. Креациите се истражувања на безбедни и нетоксични материјали во графичките техники.
-Литографијата ме натера да истражувам. Сретнав сериозно проучување за користење на нетоксични материјали во уметничките процеси. Една од овие техники е наречена литографија од кујна. Многу графички техники, а тука е и литографијата, не се творат во услови кои не се наменети исклучиво за тоа. Техниката нуди можност да се работи со неа во простории кои не се графички атељеа, а се одлична подлога за креативен процес. Користените материјали седостапни во околината. Не е потребна потрага во специјализирани продавници за сликарски и графички материјали. Дел од графиките се како монотипии, директно сликани на линолеум со бои за печатење на водена база, а дел од нив се комбинирана техника со литографија или само литографија на алуминијумска фолија за домаќинството. Третирани со материјали како сапунот и маслото – вели Малетин
Според историчарот по уметност Владимир Вукас, графиките на Малетин се слики на урбаниот градски пејзаж, кои таа ги бележи, ги пренесува на хартија користејќи го својот богат и систематичен ликовен јазик, како врвен графичар.
Малетин завршила Академија на уметности во Нови Сад. Работи како професор во Нови Сад. Имала повеќе самостојни и групни изложби.