Ракомет: Ице Соколески, тренер
– В сабота е пелагониското дерби
Ако се бара „шлаг“ на сезоната во машката Супер лига, тоа секако е пелагониското дерби Прилеп – Пелистер в сабота, 19.30 часот, во салата „Ричко“. Гостите се кандидати за првото место, домашните сакаат да се покажат пред својата публика. Мечот е привлечен поради неизвесноста.
За актуелностите еве што вели тренерот Ице Соколески.
Есенва имате една победа и два пораза?
– Поразот од Металург 2 не требаше да се случи. Не е оправдување и судиската неправда. Имавме лош ден. Следеше вреден триумф дома над мошне квалитетен ривал, Пролет, кој го скршивме во финишот. Потоа дојде пак пораз во Велес. Имавме добра одбрана, а лошнападот лош. Бргу паднавме и тешко беше да се вратиме.
Паузата?
– Поради откажувањето на Младост Богданци, бевме слободни во 4 коло. Празнината ја пополнивме со тренинзи. Ги анализиравме снимките од натпреварите и ги детектиравме грешките, кои треба да се поправат.
Пелистер?
– Стартуваше со минимален пораз во Радовиш, а потоа нареди три победи, над Металург 2, Пролет и Борец. Посилната страна им се голманот Раичиќ, бекот Орјоникидзе, пивотот Димитровски, како и крилото Чантурија.
Негативната страна?
– Фаворити се. Тоа е притисок, но и врз нив. Затоа што неуспех не е ако не го совладаш фаворитот, туку ако фаворитот доживее неуспех.
Вашата обврска?
– Борбеност. Не е срамота да загубиме од подобриот, но е срамота да не се бориме на нашиот терен докрај, без оглед на исходот.
Играчкиот фонд?
– Само Тодороски има проблем со ‘рбетот, а останатите се здрави. Очекувам максимум.
Публика?
– Очекуваме голем број навивачи. Заради гледачите, и терминот е половина час подоцна да можат и тие што прво ќе гледаат тв-пренос, да дојдат во салата.
Камческа со 28 гола
Во првите три кола од Женската лига тимот на Деспина доживеа порази, последниот дома од Пелистер (19-27). Има и светла точка – пивотот Михаела Камческа. Таа постигна вкупно 28 гола и е при врвот од листата на стрелците. Во средата наместо дома, екипата гостуваше кај европскиот вицешампион Вардар. Викендов пак гостува, на Вардар јуниор.
