Ракомет
Во понеделникот се случија првиот состанок и тренинг на ракометарите од Прилеп, членот на машката Супер лига на Македонија. Во салата на СОУ “Ристе Ристески – Ричко” со работата раководеше Рубин Лашкоски, додека за ден подоцна од Грузија беше најавен да пристигне шефот на Стручниот штаб Реваз Чантурија.
– Безмалку непроменет е играчкиот кадар од есеноска. Го немаме само пивотот Пеце Ѓорѓиески, заминат за Германија. Добро е што останува во тимов бекот Давор Шокоски. Битно е и тоа што во борбата за опстанок како десно крило ќе помогне и тренерот-играч Чантурија и покрај возраста од 41 година – рече тренерот Лашкоски.
Тренинзи в сала и во вежбалница, како и пријателски мечеви, ќе има до 12 февруари кога е почетокот на плеј-аутот и борбата за опстанок. Ривали се Јуниор КВ, Скопје и Голден арт (Скопје), Струга, Куманово, Радовиш, Вардар (Неготино). Првите пет места на табелата значат опстанок, шестото води во бараж-меч, седмото и осмото кон ранг подолу. Прилепскиот тим има свои шанси, имајќи предвид дека настапи солидно во А-групата есеноска, кога со 13 бода меѓу 8 тима беше освоено 6. место.
– Млада екипа сме, но во спортот не важи поделбата млад-стар, туку добар-лош. Младоста е само предизвик да се залагаме, да извлечеме максимум. Одличните тренери нé поддржуваат, а ние сите долго време се познаваме, сме заедно и тоа е нашата вредност. Размислуваме за директен опстанок, до петтото место – порачува левото крило Христи Бикоски.
Деновиве можни се и нови играчи, но треба да се причека за да се види колкава е финансиската моќ на клубот Прилеп.
