По повод празникот Богојавление или Водици во сите цркви во Прилеп се одржа Света Божествена литургија и Богојавленскиот водосвет. Големиот водосвет е симбол на обновувањето на нашата огревовена природа и на целиот космос преку вода и Дух. Осветување на водите се одржа во кругот на храмовите поради пандемијата, со запазување на сите мерки за зачувување на здравје на граѓаните.
Во спомен на Христовото крштевање црквата востановила празник: „ Богојавление-Божја Теофанија односно јавувањето на Света Троица.Божјата волја била на најјасен и очигледен начин на денот на крштението на Исус Христос да се открие Светата Троица и тоа: Второто Лице се крштева во реката Јордан, Светиот Дух во вид на гулаб слегува врз Него, а Бог Отец сведочи од небесата: „Овој е Мојот возљубен Син, Кој е по Мојата волја .Овој празник е еден од најголемите христијански празници каде што Бог ги потопи и очисти гревовите од целото човештво во водите Јордански. Големиот водосвет е симбол на обновувањето на нашата огревовена природа и на целиот космос преку вода и Дух.
Водици се нарекува уште и заради големиот водосвет, што го извршува Црквата два пати во годината на Водокрст и Богојавление. Со големиот празник Богојавление (Водици) се заокружува циклусот на јануарските празнувања.
Традиционално по завршувањето на службата некои граѓани ги пуштаат и гулабите да летаат од црковните дворови.
Прилепскиот архиерејски намесник Влатко Ристески со свештеник ги осветија и водите на прилепското вештачко езеро. Овој чин се одржа за прв пат и тоа без присуство на граѓани.
