“Треперење” и “Седум години” се двете нови книги што вечерва во ЦК “Марко Цепенков” ќе ги промовира писателката Марија Ѓорѓиоска. Воедно ќе се отвори и изложба на нејзини дела.
“Трперење”, со триесетина песни, е наградена збирка поезија од конкурсот “Денови на поезијата”. “Седум години” е роман за многуте страни на љубовта.
– Тема се судбините на повеќе прилепски семејства од 1940 година до првата декада од 21 век. Припаѓа на психолошко – социјалните романи, со нагласени мелодрамски елементи. Сведочи не само за мените на личностите, ама и за мените на времето и општествените околности за седум децении – вели Слободан Беличански.
Ѓорѓиоска е автор на осум романи и две стихозбирки. Застапена е во бројни поетски збирки и учестува на поетски манифестации. Добитник е на награди и признанија, меѓу кои и Третоноемвриската награда на Прилеп. Член е на Клубот на литературни творци – Прилеп и на ДНУ.
Знам
Знам,
Ти си сега сам
И една мисла те мачи –
Зошто со тебе не сум
Штом присуството мое
Многу ти значи.
Навечер, штом твојата улица
Потоне в мрак,
Сонуваш дека во моите мирисни коси
Спиеш пак.
Тивок шепот ноќта ти носи,
Чиниш јуриме како некогаш
Насмеани, боси.
А в зори, штом ноќта стивне,
Се будиш со болка и тага,
Се брише тешка лага
В час
Со мислата што те мачи –
Зошто со тебе не сум јас?
М.Ѓ.