Девојчето на 11 години со дарба за рецитации беше едно од шеесетината возрасни учесници на Македонскиот митинг на поезијата во Гетеборг во Шведска. Малата Ангела Велјаноска со прилепски корени го покажа наследениот талент за пеење поезија. Рамо до рамо со возрасните Македонци кои рецитираа македонски патриотски песни, небаре актер со искуство ги излеа стиховите на детската песничка ,,Веверица,, создадена од дедо í Томе. За успешниот настап, најмалиот учесник доби громогласен аплауз и овации од неколкуте десетици набљудувачи на 28 издание на манифестацијата Македонска поезија, што секоја година ја организира Сојузот на Македонците во Шведска.
На манифестацијата настапи и нашиот сограѓанин со потекло од селото Марул, пензионерот Томе Велјаноски, изведувајќи своја песна инспирирана од љубовта кон Татковината.