В недела
На 27. април, правото на глас за предвремените парламентарни избори и вториот круг на претседателските избори ќе можат да го остварат 64 567 граѓани на 142 избирачки места во градов. Ова е завршен круг за претседателските избори меѓу кандидатот на ВМРО – ДПМНЕ, Ѓорѓе Иванов и кандидатот на СДСМ, Стево Пендаровски. Во првиот круг, Иванов имаше 51,09 отсто, а Пендаровски 37,51 отсто од гласовите.
Предвремените парламентарни избори ќе се одржат во еден круг според пропорционалниот систем. Тоа значи дека нема втор круг. Распределбата на пратеничките мандати ќе се врши со примена на Донтовата формула, која во основа претставува едноставно делење на бројот на гласовите што ги освоила секоја кандидатска листа, при што се добиваат изборни количници. Зависи од одѕивот на гласачите, но за пратеничко место ќе бидат потребни по 7000-10000 гласа. За 20 пратенички места во изборната единица 4, каде е и Прилеп, ќе се гласа за 11 пратенички листи. Прилеп е заедно со Кавадарци, Неготино, Демир Капија, Валандово, Гевгелија, Дојран и Струмица со околните општини.
