Државата определи субвенции за вработување на ранливите категории граѓани.
Распишан е оглас за субвенционирање на вработувања од шест месеци во бруто износ од 13 илјади денари. Во ова група се долгорочно невработени лица најмалку пет години, млади до 29 години и лица од 50 до 59 години.
Државата нуди бенефиции за вработување со субвенции уште и за жртви на семејно насилство, бездомни лица, поранешни корисници на дрога, родители на деца од улица, самохрани родители, Роми, жртви на трговија со луѓе и осудени лица по отпуштање од казнено поправна установа. Агенцијата за вработување покрива 14 илјади денари бруто плата, плус 3 илјади денари стимул за работодавачите за шест месеци, чија обврска е да го задржат конкретното лице минимум уште 12 месеци или вкупно 18 месеци.
Невработените лица кои до 18 годишна возраст имале статус на деца без родители и родителска грижа, а кои своето вработување сакаат да го решат со активните мерки, државата ќе помага 100 отсто во бруто минималната плата за првата година и 100 отсто од износот на минималната нето плата, плус 50 отсто од придонесите во втората година.
Граѓаните и бизнис заедницата можат да конкурираат до 31. јануари.
