Жителите од 47 села од општините Прилеп, Долнени и Кривогаштани ќе имаат “рурален лекар”. Станува збор за проектот на Здравствениот дом зао превентивни прегледи, оти неколку илјади жители повеќе години немаат лекар и доаѓаат по здравствени услуги в град.
– Екипите ќе прегледуваат по четири часа во секое село еднаш неделно. Прегледите ќе се вршат во училишните згради. Ќе се мери крвен притисок, шеќер во крвта и ќе се пренесуваат здравствени совети – вели Петар Ристески, директор на Здравствениот дом.
На почетокот се ангажирани вработени, но се планираат нови вработувања.
Дваесет и две лица, на возраст од 10 до 29 години, корисници на услугите од Дневниот центар за деца со посебни потреби, ќе добиваат дополнителна здравствена заштита преку проектот “Стоматолошки услуги во домашни услови”. Тој е прв од таков вид во државава, реализиран од Здравствениот дом на иницијатива на НВО Орхидеја.
Седум од децата кои ќе ги користат овие услуги се сместени во згрижувачки семејства, а за сите Центарот за социјална работа има обезбедено бесплатен превоз од дома до Дневниот центар.
