74 ГОДИНИ ТЕАТАР

Годишнина

Театарот “Војдан Чернодрински” утревечер ќе прослави 74 години од формирањето, од денот кога завесата се кренала на 18 февруари 1950 година со изведбата на претставата “Кир Јања” од Ј.С.Поповиќ, во режија на Аце Михајлоски. Годишнината ќе биде одбележана со изведбата на најновата претстава “Стапица за глувци” според текст на Агата Кристи, во режија на младиот режисер Борис Василески, во која се говори за тоа дека секој мисли дека неговата перспектива е правилната, но што е, всушност, вистината?

Различните генерации на актери ределе премиери, имало и падови, но и успеси на театарот. Прикажни се околу 360 премиери, одиграни над 7500 претстави кои ги гледале над 1,7 милиони луѓе. Најгледаната и најиграна, изведена, стопати, е “Солунски патрдии” од Миле Попоски, во режија на Коле Ангеловски, па потоа “Од кол на кол”.

Театарот направи уметнички скок со претставите “Тапани во ноќта”, “Кавкаскиот круг со креда”, “Швејк…” во режија на Мартин Кочовски, со  “Силјан Штркот” според Цепенков, во режија на Бранко Ставрев, потоа “Кумови”, “Собирен центар”, “Туѓо сакаме свое не даваме”, “Колобан”, “Молам за секс”… Белег на растеж на театарот дале и претставите “Спиро Црне” од Б.Р. Платнар во режија на Владимир Милчин, “Колобан” од Блаже Алексоски во режија на Љубиша Георгиески, “Арсениј” од Б.Р. Платнар, “Полковникот птица” од Христо Бојчев и “Опера за три гроша” од Брехт и двете во режија на Владо Цветановски.

Претстава која најмногу го сврте вниманието не само на македонската, туку и на балканската публика е “Тапани во ноќта” од Брехт, во режија на Мартин Кочовски, која освои три награди на фестивалот МЕСС во Сараево и беше победник на 44-то издание на МТФ ,,Војдан Чернодрински,,. Не помалку наградувана е ,,Кавкаскиот круг со креда,, која во 2011 година беше прогласена за најдобра на фестивалот Екс Понто во Љубљана. Десетина награди има освоено на МТФ “Војдан Чернодрински”.

Театарот во земјава го има приматот на куќа во која се даваат праизведби на текстови од македонски драмски автори. Од 2004 година работи во состав на ЦК “Марко Цепенков”.

Loading