Се интензивираат пробите за претставата „Глембаеви“ по текст од Мирослав Крлежа, што на сцената на театарот ја поставува хрватскиот режисер Бранко Брезовац. ,,Глембаеви,, е канонска драма на хрватската книжевност, но и драма играна насекаде на просторите на поранешна Југославија, па и неколку пати во Македонија.
Најдобрата драма на Крлежа говори за пропаѓањето на една моќна капиталистичка фамилија, за начинот како настанало нејзиното богатство и како се распаднала. Во времето на денешната тајкунизација, која владее со сите транзициски простори, темата е клучна за храбриот влез во вибрирањето на театарската современост и неспорната актуелност.
-Било што се поставува в театар е заради општестевни причини или некои причини што го мачаат театарот или пак режисерот. Глембаеви ги гледам од поширока општествена ситуација, бидејќи е интересен текст, што сите на овие простори сме Глембаеви, сите се обидуваат да бидат магнати, индустријалци, тајкуни, да заработат лесно пари, без морал, со малверзации. Глембаеви се многу актуелни, бидејќи такви ги има на сите страни. Една од причините за поставувањето на сцената е современоста на претставата. Втора што текстот е многу длабок, сериозен. Третата, состојба е мојата желба да ги поставиме тие психолошки состојби од текстот на друг начин. И најважно е што има некоја поврзаност меѓу мене и театарот, откако ја работевме Антица. Таа претстава беше спектакл, без психолошко профилирање, а ,,Глембаеви,, ќе биде интересна, затоа што е големо дело и Крлежа е голем писател – вели режисерот Брезовац.
Играат Даниела Иваноска, Зоран Иваноски, Андон Јованоски, Димитар Црцоркси, Ангела Наумоска, Игор Трпчески, Исидор Јованоски и Трајче Иваноски.
Премиерата е планирана з акрајот на септември, бидејќи веднаш потоа со петмина хрватски актери се работи заедничката претстава ,,Глембаеви и уште една легенда,, што премиерно ќе биде прикажана на почетокот на октомври.
Брезовац посочува дека ќе бидат две различни визуелни претстави.
-Заедничката ќе има необичен спој, ќе биде интересно за гледање. А во Хрватска можно е гостување кон крајот на ноември – посочува режисерот.
