Пинг-понг: Според првите 4 кола и меч-разликата од 16-4
– Совладани Мултитекс, Шампион ФА. Работнички и Телеком
Најголемите пингпонгарски приврзаници тешко да се сетат најпрецизно кога точно екипата на Младост последен пат беше шампион на Македонија. Ништо чудно со оглед на тоа што последната титула е освоена во сезоната 2009/2010, под водство на тренерот Зоран Јованоски, со играчите: Ѓоко Јочкоски, Гоце Тошески, браќата Гоце и Александар Штаргоски. Оттогаш наваму како одминуваше времето, така врвот од табелата беше се подалеку, сé до есенва, кога и без громогласна најава на амбициите се гледа дека целта е титулата. Наредени се 4 победи: против Мултитекс Битола (4-0), Шампион ФА Штип (4-1), Работнички Скопје (4-1) и Телеком Скопје (4-2) со малку изменета постава. И сега тренер-играч е Јованоски. У ште играчи се Јочкоски и А. Штаргоски. Повратник е Петар Јованоски, а од пролетоска апсолутно нов е само Љубиша Милошевиќ од Србија.
Двајца играчи на Младост, Милошевиќ и Јочкоски, се во десетте најдобри на ранг-листата по четирите кола. Што се однесува до Милошевиќ (53), се работи за искусен играч, кој редовно учествува во ветеранска конкуренција, но се уште успешен е и во сениорска. Тренира во Белград, а игра за два клуба – Чукарички Белград и Младост, исто како и Кристијан Станојковски, пингпонгар во Србија и во Вардар Скопје. Милошевиќ придонесе за сите есенски победи на Младост, без ниеден пораз и преку 5 добиени партии со сет-разлика од 15-2. Високо на ранг-листата е и Јочкоски, со 5 добиени и 1 загубена партија, со скор во сетови 15-7. Ова се одлични резултати, но првенството штотуку почна и допрва се разгорува битката за титулата. Во првиот круг преостануваат уште три кола, со оглед на тоа што Лигата брои осум тима.
Освен Младост, резултати за почит имаат и членовите на Младост 96. По почетните порази од Телеком (2-4) и Вардар (0-4), беа постигнати две победи, над Мултитекс (4-0) и Шампион ФА (4-1). Придонесоа: тренерот Гоце Тошески, играчите Александар Рикалоски, Петар Костовски, Антонио Стомнароски и Андреј Лашкоски. Амбицијата и на овој состав е висок пласман.
Табела: Вардар и Младост по 8, Телеком, Младост 96 и Работнички по 6, Шампиони ФА и УГД по 5, Мултитекс 4.
Дерби во „Добре Јованоски“
Кој сака пинг-понг може да гледа в недела, во салата од ОУ ,,Добре Јованоски,, каде што на осум маси ќе се играат две кола од машката и женската лига. Привлечна е машката конкуренција, каде во 5 коло Младост се среќава со УГД, а Младост 96 со Работнички. Во 6 коло е ,,шлагот,, со прилепското дерби Младост – Младост 96. Младост веќе ја истакна кандидатурата за врвот, со триумф ќе ја потврди, а ако биде обратно – Младост 96 ќе може да се смета за еден од аспирантите.
