Изложба „Разјраено езеро“ од 30 дела од Кристина Зимбакова ќе биде отворена вечерва од 19.30 часот во галеријата од ЦК „Марко Цепенков“. Низ творештвото провејува интердисциплинарниот приод кон ликовната уметност – спој на сликарството, поезијата и природните науки.
Симболичниот и фигуративен израз, вткајувањето поетски мотиви од Благоја Ристески – Платнар и Ен Секстон, габите и лишаите како изразни средства и богатата текстура се клучни обележја на делата. Сликите се во комбинирана техника и често се поигруваат со границата меѓу слика и скулптура. Дел се креирани на рачно изработена хартија и пулпа од габи, а некои на мико-пена, што е биоматеријал од габен мицелиум и земјоделски отпад. Вметнати се впечатливи и ретки видови габи и лишаи од Македонија, но и од САД, Јужна Америка, Арктикот и Антарктикот.
Зимбакова имала повеќе самостојни и групни изложби во земјата и во странство. Добитник е на повеќе награди и стипендии. Нејзините дела се наоѓаат во САД, Велика Британија, во неколку македонски амбасади низ светот.
