Фудбал: Зоран Штерјовски, тренер
-Тешкиот дел од подготовките е причина за слабите резултати
Повеќе од еден месец траат подготовките на Победа. Тренинзите беа во градов и во Охрид, каде се одиграа пет пријателски меча (Новаци 1-1, Борац Чачак 1-3, Спартак Суботица 1-3, Крупа Врбас 0-3, Велазерими 1-2). Резултатите се скромни, но некогаш е подобро сега да се губи, а во првенството да е обратно. Играчкиот кадар има конечен список од 25-26 фудбалери, така што точно се знае со кои сили ќе се дочека пролетниот старт на првенството. Впечатоците за сработеното ги дава тренерот Зоран Штерјовски.
Колку реализиравте од планот?
– Пробавме доста работи и го променивме системот. Дел од играчи сакавме да ги видиме на други од своите природни места. Имаме слика за староседелците и новодојдените. Горе-долу задоволен сум од сработеното.
Комбинацијата од тренинзи со пет натпревара?
– Во Охрид беше најтешкиот дел од подготовките, што можеби е причина за слабите резултати на тие натпревари. Максимално одработивме. Најбитно е што нема повреди. Подготвени ќе го пречекаме пролетниот дел.
Давате шанса на сите?
– По едно полувреме сите одиграа, оти напорни беа тренизите. Ривалите беа силни. Може да се каже дека тоа е добро, бидејќи со силен противник имаме мотивација. Можевме да видиме дека сите играат фудбал, не само ние во Македонија.
Грешките?
– Во одбраната ги имавме доста. Практично подарувавме голови на противникот. Тоа се должи на деконцентрацијата. Тука ќе мора да се поправиме и на тоа работиме.
Седумтемина нови?
– Голманот Никола Тошески, левиот бек Звездан Ѓорѓиловиќ, офанзивниот за врска Милан Војводиќ и крилниот напаѓач Мирослав Станиќ дојдоа од Србија, шпицот Уемерсон Рамон од Бразил, а тука се уште дефанзивниот, централен играч за врска Благојче Коњарски и десниот бек Бојан Георгиевски. Квалитетите се на завидно ниво.
Подобри сте од есеноска?
– Шест пуштивме и седум зедовме Имаме по двајца на секоја позиција. Очекуваното го добивме. Конкуренцијата ја зголемивме. Тоа што ни недостасуваше – силна клупа – имаме.
Преостанати тестови?
– Викендов одиме во Кавадарци на турнирот ,,Вуко Каров”. Ќе има два меча, а учесници се Тиквеш, Борец и Металург. Тие се последните тест-мечеви. Потоа се финалните подготовки за дербито со Пелистер.
Колективниот дух е најбитен
Ваши коментари на неколку фудбалски тези:
1. Ако се бориме, можно е да изгубиме, а ако не се бориме – изгубени сме.
– Со кој и да е противник, Реал или Барса, мораш да играш, да се покажеш, да дадеш максимум. Без борба можеш од секого да загубиш. Како ние со Велазерими.
2. Ниеден играч не е толку добар, колку што се добри сите заедно?
– Најдобра изјава. Колективниот дух е најбитен во фудбалот. Погрешно е ако само поединци настојуваат да се истакнат. Тимот мора да функционира како еден. Победа нема поединци да се издвојуваат.
3. Добар играч може да добие еден меч, а добра екипа пет со ред?
– Надополнување на претходното. Мора колективно да се игра. Поинаку не може.
