Општина Прилеп и УСАИД
Санација на старите градски извори
Во Скопје се одржа третата меѓународна конференција за климатски промени организирана во рамките на проектот на УСАИД на која учествуваа домашни и меѓународни експерти, граѓански организации од земјата и регионот, научници и практичари од областа на адаптацијата и ублажувањето на климатските промени, експерти за одржлив развој како и претставници од приватниот сектор. Прилеп беше една од десетте општини кои беа директно вклучени во овој проект, преку кој беше изработена Стратегија за климатски промени за периодот 2017-2022, а за реализација е избрана санацијата на старите градски извори.
Директорот на УСАИД во Македонија, Џејмс Стајн, порача дека главна цел на проектот е зголемување на отпорноста на локалните заедници и зајакнење на нивните капацитети да одговорат на предизвиците како поплави, ерозија и управување со водните ресурси.
– Подготвен е пристапот Зелена агенда што е клучен момент за УСАИД и партнерите. Тоа е можност да се погледа наназад на заедничкиот напредок во минативе четири години во справувањето со локалните предизвици на климатски промени со кои е соочена Македонија – рече Стајн.
Проектот е со проактивен пристап во прилагодувањето кон климатските промени и дава приоритет на стратегиите, базирани на локалните потреби. Беа вклучени локалните власти, граѓаните и граѓанските здруженија. Се изработија ефикасни локални стратегии за намалување на јаглеродните емисии и унапредување на адаптацијата. Имплементирани се 17 капитални мерки во десетте општини, кои ќе им помогнат на најранливите жители да ја зголемат отпорноста кон климатските промени.
