Фудбал: Зоран Штерјовски, шеф на Стручниот штаб
Примарен е опстанокот, а секој погорен пласман е добредојден
Откако седна на клупата од Победа, ја водеше на 14 меча. На 11 првенствени постигна две победи, четири нерешени и пет порази. На три куп-меча имаше по една победа, реми и пораз. Резултатите се скромни со пласман на осмото место од прволигашката табела. Клубот верува и веќе се гради заедничката стратегија за напролет. Последниот меч се случи највисокиот пораз со 3-0 во Штип?
Реванш куп-мечот со Брегалница?
– Со оглед на настаните на натпреварот, резултатот е многу висок. Имавме многу повредени играчи. Не играше скоро 60-70 отсто од првиот тим. Добија шанси младите. Најдовски го ослободивме од оправдани причини, Шаркоски се повреди…
Играта?
– Пак примивме евтин гол по центаршут од 30 метри, при што Манчевски слабо реагираше. Попусто имавме 65 отсто од поседот на топката и на 0-0 неколку шанси. После 1-0 кога напаѓавме и целосно се отворивме примивме уште два гола.
Тука заврши сезоната, а вие уште трениравте?
– Не само што трениравме, туку имавме и ја анализиравме полусезоната на екипата и секој играч поединечно.
Претстоиодмор?
– Одморот е кус, но добредојден е за играчите кои беа доста уморни низ натпреварите среда – недела – среда. Ростерот беше мошне ,,тенок”. Некои играчи се повредија. Сега е можност да се опорават и да се вратат во ритам со програма што ја одредивме.
Планирате добри подготовки?
– Тоа недостасуваше. Не бевме физички добро подготвени на изминатите натпревари и според тоа, овие подготовки ќе бидат клучни да се подигне тоа ниво. Очекувам да немаме такви проблеми напролет.
Забранивте мал фудбал?
– Да, строго забрането е играње на турнир. Забраната е само за турнир, а меѓу себе ако играат дозволено е.
Планирате засилувања?
– Двајца веќе пристапија: Бразилецот Рамон и Србинот Војводиќ. Првиот е напаѓач, вториот офанзивен за врска. Србинот го гледав, а Бразилецот играл во Хрватска и потоа потпиша.
Уште колку нови очекувате?
– Четворица. Потребен е голман, крилен напаѓач, во средина и доколку дојде уште некој во последната линија. Практично, во сите линии.
Се разделивте со шестмина?
– Моравме да го растовариме буџетот, кој е целосно зафатен. Ако не отпуштиш, не можеш да земеш.
Зошто Манчевски, Мегленски, Дунимаглоски, Здравески, Спиркоски и Трајкоски?
– Сите имаа шанси да докажат дека треба да останат во клубот. Не се вклопија. Манчевски слабо одбрани. Искусен голман, но потфрли на некои натпревари. А најплатен играч е во екипата. И останатите не го дадоа она што се очекуваше.
Завршивте на осмо место. Како гледате на пролетниот дел?
– Примарно е обезбедувањето на опстанокот. Со играчите што ќе ги доведеме и со добри подготовки очекувам сигурно да опстанеме. Ако ни се даде шанса, ќе се бориме и за повисок пласман.
Понуда од Турција
Планирате тренинзи надвор од Прилеп?
– Имаме понуди за Турција. Ги разгледуваме најдобрите. Турција е одличен избор за подготовки, каде има и одлични услови и квалитетни противници за пријателски натпревари. Алтернатива е Охрид. Цената е речиси иста за Анталија и Охрид. Ќе видиме која е најдобрата опција.