ОУ „Блаже Конески“
Со свечена академија организирана во народниот театар „Војдан Чернодрински” се одбележа патрониот празник на ОУ „Блаже Конески”, како и 30 годишнината од формирањето и изградбата во населбата Точила. Училиштето го носи името на еден од нашите најголеми великани Блаже Конески, истакнат македонски книжевник, академик, литературен историчар, професор на филолошкиот факултет, како и еден од кодификаторите на современиот македонски јазик. Блаже Конески е роден на 19 декември 1921 година во прилепско Небрегово, а починал на 7 декември 1993 година.
Одбележувањето почна со полагање на свежо цвеќе пред споменикот на Блаже Конески во центарот на градот. Чествувањето потоа продолжи со активности во училиштето.
– Беа пофалени сите ученици со освоени награди на општински, државни и меѓународни натпревари – рече директорот Марија Дулеска.
На свечената академија, градоначалникот Марјан Ристески најави уредување на дворното место во централното училиште, а доколку се обезбедат средства ќе се изгради и термоизолациона фасада. Во програмата на Министерството за образование е изградбата на новата спортска сала.
Во програмата, хорот ја изведе училишната и државната химна. Во првиот блок настапи Ана Марија Манческа со лична творба, рецитаторската секција го изведе перформансот „Стерна – од предание до песна”, Сара Петанческа со „Од возот”, Александар Јанкулоски со лична творба и „Месечина” е соло песната во исполнение на Јована Пирганоска. Следеа изведбите на “Дафино вино црвено” – дует на Анастасија Мирческа и Меланија Каралиоска, „Женско пуштено оро”, хорот со „Огин го гори Брезово” и „Борјано, Борјанке”, па драматизациите „Волшебникот од ОЗ” на учениците од IV-1 одд., новогодишен рецитал на учениците од IV-5 одд.од Варош, балетот „Снежната кралица” на шестоодделенците и соло песна со кореографија на Сара Лоџева. Настапија и англиската и француската секција со „Микс 2″ и “Ден бр: 1”, за круна на приредбата беше модерниот балет.
