Историјата не се заборава. На 23 Октомври пред 123 години, во Солун, шестмина македонски интелектуалци Иван Хаџи Николов, д-р Христо Татарчев, Даме Груев, Петар Поп Арсов, Антон Димитров и Христо Батанџиев ја создале првата семакедонска организација која со текот на времето го менувала името, но останале двете придавки: „македонска” и „револуционерна”. Сегашните генерации, овој историски ден го празнуваат како државен празник, како ден на македонската револуционерна борба, го слават и им се поклонуваат на делата на револуционерите. Нивниот факел го прифатија десетина, стотина, илјадници следбеници за автентичната македонската револуционерна организација и за извојување на национална слобода.
Се бореле илинденските идеали да станат наша реалност, за континуитетот на македонската револуционерна борба и правото на народите на самоопределување. И сите тие го предводеле народот, гледајќи ја слободата во мугрите на независниот опстој за самостојна, суверена и демократска држава. На 23 октомври младите се вртат кон делото на нивните предци кои се изборија за нивната слобода и слободата на нивните деца.
Празникот потсетува на заветите на сите борци за слободна и независна држава. Идните генерации да продолжат по патот кој води до просперитетна, посреќна, побогата и посплотена европска Македонија.
И годинава, по повод одбележувањето на државниот празник 23 Октомври, делегација од локалната самоуправа на општина Прилеп, од политичките партии и од здруженијата и граѓани положија свежо цвеќе пред споменикот на Методија Андонов – Ченто, Пере Тошев, Ѓорче Петров и на Могилата на непобедените и на гробот на Методија Патчев во Кадино село.
По повод празникот во просториите на новата спортска сала во ОУ „Добре Јованоски” се оддржа државно првенство во џудо за млади во организација на ЏК „Бушидо”.