По поднесената кривична пријава против туристичката агенција Сториа травел за измама на Македонци од САД со евтини авиобилети, Обвинителството отвори истражна постапка против управителката и фирмата. Како управител од крајот на 2015 година до крајот на август годинава, со намера за себе и за правното лице да прибави противправна имотна корист, довела и одржувала во заблуда осум лица од Прилеп, четири од Скопје, две од Струга, по едно лице од Тетово, Битола и од Охрид и четири лица од Австралија, како и едно правно лице од Скопје. Покрај тоа што знаела дека не е овластена да продава промотивни авионски билети по цени пониски од реалните, како и дека не поседува потребни дозволи за организирање авионски превоз – ИАТА – сертификат, во контактите со оштетените лажно прикажувала дека фирмата е регистрирана и го поседува потребниот сертификат. Оштетените, дел од паричните средства ги плаќале на сметката на агенцијата, а дел во готово. Не им биле обезбедени сместувачки капацитети во хотелите, ниту авионски билети за уплатените дестинации. Парите противправно ги присвоила за себе причинувајќи штета од 3.2 милиони денари.
Поднесен е предлог за определување на мерка притвор.
