Српската фирма „Кото инженеринг“ ја почна изградбата на изгорените конаци на манастирот Трескавец. Градежните работи се во полн ек, од западниот, источниот и северниот конак на површина од 2000 м2. Реконструкцијата на целиот манастирски комплекс треба да заврши до 2018 година.
– Одлично е портфолиото на фирмата “Кото”. Работи на реставрација на вакви споменици и има постигнато добри резултати. Конаците ќе се изградат за три години, оти Трескавец е споменик на култура. Се договоривме за друг пристап за камионите до манастирот за непречено изведување на работите – изјави министерката за култура Елизабета Канчевска – Милеска.
“Кото” ќе се потруди да го врати сјајот на конаците предвреме, според сите стандарди.
Паралелно, Заводот и Музеј работи проекти за црквата, магерницата и трпезаријата кои датираат од 13 век.
Според Канчевска – Милеска, елаборатот за превентивна заштита треба да биде готов следната недела.
– Идната година започнува конзервацијата – додава таа.
За градоначалникот Марјан Ристески, обновата на манастирот ќе влијае за развојот на манастирскиот туризам.
Според отец Калист за МПЦ е важна и изработката на проектите за црквата, трпезаријата и магерницата.
– Џабе ќе бидат конаците ако не се реконструираат црквата, трпезаријата и магерницата. Имаме ветување од Министерството за култура – вели тој.
Конаците на Трескавец изгореа февруари пред три години.
