Светската банка му додели грант на Прилеп
Локалната самоуправа доби грант од 130 илајди евра од Светската банка за изградба на дел од инфраструктурата на индустриската зона Прилеп 1, каде се креваат погони на осум домашни компании од 20 продадени парцели. Градоначалникот Марјан Ристески вели дека грантот е плод на успешно реализираниот проект “влезот на градот”. Со поддршка на банката, Владата и општината, се отвори модерната улица “Александар Македонски” со четири ленти, долга над два километри.
– Донацијата е осум милиони денари за асфалтирање на улици од околу 400 метри, тротоари и осветлување во зоната. За брзо време ќе се комплетира зоната и сите фирми ќе ја почнат градбата. Просторот ќе се претвори во современа индустриска зона каде ќе се ангажираат околу две илјади нови работници – вели Ристески.
Наскоро и во зоната Прилеп 2 тргнуваат работите на инфраструктурата. Продадени се пет локации за мали компании. Останува да се заврши урбанизацијата уште на десетина плацеви и да се понудат на домашни и странски стопанственици.
Паралелно при крај е градбата на огромниот фабрички објект на американската компанија Гентерм во зоната Алинци. Интензивно градат и германските инвеститори од фирмата Акумпласт. Вложувањата се неколку милиони евра за две илјади работници.
