Ракомет: Рубин Богојески е нов тренер на женскиот Прилеп
– Приоритет е обуката на сопствениот кадар
Промена во женскиот ракометен тим на Прилеп. На првиот пролетен куп-меч со фаворитот Металург во Скопје, наместо Жане Дисоска екипата ја водеше досегашниот помошник Рубин Богојески. Поранешен бек е на Тутунски и настапувал во Словенија, Косово и Грција. Како тренер беше инволвиран во клубот Прилеп Р/3.
Како помина првиот меч?
– Најбитно беше да одиграме, да не се откажеме. Настапивме со иста постава и само со една – две измени, оти имаме на располагање неколку премлади девојчиња. Голмани беа Наумоска и Богеска, крила Ѓорѓиоска и Рипилоска, бекови Јовановска, Ристовска и Митроска, а првпат пивот беше Камческа, по повредата на Кимоска. Крстевска играше во одбрана и секаде пополнуваше на бек или крило.
Задоволни ли сте од изданието?
– Девојките го почитуваа договореното. Добро одиграа до финишот. Нападот даде 25 гола. Не е малку на силниот противник. Бекот Јовановска постигна дури 13 гола, од кои 12 од игра и еден од пенал. Процентот беше фантастичен – реализација од 14 удари. Имавме девет негатива до две минути пред крајот и со играч повеќе, наместо да намалиме на шест – седум, примивме уште три.
Што се случи?
– Имавме и избрзани шутови и технички грешки. Концентрацијата попушти. Неискуството го направи своето. На поправање на овие пропусти ќе посветиме посебно внимание на тренинзите до стартот на првенството предвиден за 26 март.
Одредивте приоритет?
– Приоритет е да се гради екипата од сопствен кадар. Младите да го носат товарот. Нека има засилувања таму каде што мора, но и нашите да го даваат придонесот, да бидат носителки. Добро е ако максимално се вклучат, се активираат како во саботата што се случи кога Рипилоска и Камческа беа меѓу стрелците.
Пролетва е борба за плеј-офот?
– Имаме шанса, оти сме со девет бода. Играме против директните конкуренти Пелистер и Овче Поле. Само еднаш да победиме, ќе продолжиме во плеј-офот. Се надевам дека ќе бидеме комплетни, оти Аџулеска уште не е приклучена, а Јовановска ја повреди ногата на последниот дуел.
Лигата е премала?
– Само седум тима, со Вардар осум. Првенството бргу ќе заврши за тие две екипи што ќе отпаднат. Затоа има предлог сите да влезат во плеј-офот. Би требало и во едната и во другата варијанта да бидеме во друштво со најдобрите.
УЧев од Чурлевски
Вие ги обучувате девојките, а кои беа Вашите учители?
– Многу научив од Чурлевски, кој ми беше тренер во Косово. Човекот беше доктор за ракомет. Претходно купував знаење од Зечевиќ, Богдан Маковеј и од другите, домашни стручњаци.
