Во галеријата од ЦК „Марко Цепенков“ вечерва од 19 часот ќе бидат презентирани творечки предизвици на македонските уметници на изложбата „Мал формат“.
Малиот формат веќе е децениски опит, етаблиран во скелетот на културните и, особено, ликовните случувања. Во културната периодика претставува светол момент во колективната меморија.
– Малиот формат е честа дневна практика на сликарите и скулпторите во ситната пластика. Магијата на „малиот квадрат 25х25“ е искушение и за најголемите мајстори на четката и бојата. Пикасо, Дали, Матис, Лотрек, Ван Гог, Гоген, сликари од сите школи и правци го чувствувале внатрешниот порив да го совладаат малиот квадрат, и на концизен, лапидарен, понекогаш метафоричен и езоповски начин, да го транспонираат собитието и мотивот од големото платно во помалата мерка – велат од ДЛУМ.