Мал фудбал: Турнир Свети Никола
– Возбудувањата до 27 декември
Традиционалниот хуманитарен турнир во мал фудбал “Свети Никола”, кој стартува денеска во Универзалната сала, има точно 33 пријавени екипи. Најавени се фудбалери од ниските до највисокиот ранг, што е гаранција за квалитетот. Меѓу првите, своја екипа пријави поранешниот секретар на ФК Корзо, Александар Попов. Интересно е името на тимот Македонска фаланга.
– Името беше планирано за клуб во општинската лига, а еве го промовираме на турниров. Не можам да ги кажам и откријам играчите. Целта е достојно претставување – скромен е Попов.
Има играчи кои настапуваа лани во една, сега во друга екипа. Се менуваат имињата и спонзорите. Меѓу поредовните учесници е голманот Христијан Сркески од Кожуф. Екипата се вика Де – ни каде уште ќе играат Димитриоски и Љамчевски од Пелистер, Петрески и Колевски од Победа, Кондоски… Амбицијата е висок пласман во поделбата на наградите.
– Лани бевме четврто место. Сега желбата е барем да го повториме успехот – вели Сркески.
Меѓу најатрактивните екипи се Кабелнет и Вецески. За Кабелнет “капарени” се браќата Брњарчевски, Бујаку, Мојсовски, Пластиновски, Даноски…. Брзиот и незадржлив Даноски од Металург лани беше прогласен за најдобар играч на турнирот. За Вецески настапуваат Цветковски, Ветаџокоски, Џонов, Тодоров, Попов од Миравци, Тошески од Победа… Можно ли е докрај да се пробијат двете фаворитски екипи и да гледаме финале Кабелнет – Вецески?
– Постепено, чекор по чекор, меч по меч. Големо задоволство е малиот фудбал, а ако стигнеме во завршницата, тоа ќе биде голем спектакл и доживување – најавува тренерот Коле Вецески.
Синоќа беше извлекувањето, а денеска е стартот на хуманитарниот турнир. Приходот е наменет за помош таму каде е најпотребно и затоа се очекува масовна посета на натпреварите до 27 декември. Прво се предвидени дуелите по групи, потоа по две од секоја група се во осминафиналето, а елиминациите или “нокаут” фазата е до самото финале. Наградата за прво место е 200 илјади денари, а трофејот го брани Спорт лајф.
ВЛЕЗНИЦА ОД 20 ДЕНАРИ
Организаторите Локалната, Пиварницата, Комфи ангел и Младинската мултикултурна заедница, одредија популарни цени на влезниците. За првата фаза влезот ќе чини 20, за втората 30, а за полуфиналето и финалето само 50 денари. Во обичните денови програмата ќе почнува попладне, а во викендите многу порано.