Прва самостојна изложба
„Милоста на боите“ е изложбата на слики на сограѓанката Павлина Илијеска што ќе биде отворена в сабота напладне во ликовниот салон на ЦК „Марко Цепенков“. Илијеска повеќе години живее и твори во Грција, а мотивите ги црпи од природата, морето, реките, планините. Првпат се претставува во градов.
Павлина ги зела в раце четките и боите на повозрасни години, иако од мали нозе ја привлекувала уметноста. Ја “заразил” покојниот наставник Стеван Василески. Еден период творечка преокупација í била глината, ама продолжува со сликањето. Таа сака гледачот да патува низ делата.
Етнологот д-р Ели Луческа забележува дека мислите и емоциите авторката ги “разголува” од нејзините распеани, живописни, светли тонови, во кои преовладуваат зелената и сината – боите на бескрајноста, напредокот, здравјето, плодноста, веселбата. Успешно ги компонира со визуелниот податок, креативната работа и талентот за комбинирање на понудените содржини.
– Иако аматерска, а напати и невешта, текстурата на делата милозливо пренесува чувствителен лирски штимунг кој сугерира длабок емотивен поттик. Силната желба за себереализација и себеусовршување придонесува да експериментира и во сферата на апстракцијата како голем предизивик на мислата да излезе од вообичаената претстава на визуелната стварност и да се претвори во естетски коректна изведба со пријатно неповторувачко доживување- вели Луческа.
Илијеска имала три самостојни изложби во Лерин.
